كلمات قصيدة الدار

كلمات قصيدة الدار

الدار من نظم سيدي قدور العلمي رحمه الله

واش ما عار عليكم يا رجال مكناس
مشات داري فحماكم يا اهل الكرايم
***
كيف ما ينكد قلبي من شفاية الناس
كيف ما نحزن يا بعدي على المراسم

وكيف بعد فراق اوكاري نروم الجلاس
حوز بوطيب لو نملك الغنايم

شموس بصري الأشراف الطيبين الانفاس
جفيتهم لا زال دوازي عليه نادم

حمايتي واهلي واحبابي وعز لوناس
حوز وكري ملقاهم عالقلب شاهم

كيف ينجى من تلاني عقاب الاجناس
وكيف يربح من خلاني تليف هايم
***
من قوة ما صبرت عن فرقة رسمي
حتى قالو ا نشفت من ندوة الكلام

فرحي للناس ظاهروحزني مكمي
سني يضحك وساكني بالجمر ظلام

مرسمي خويا الشقيق من يويا وامي
واش ينسي فمنزل لغريب الاخ الهمام

نصبر عن عين العدا ونخفي همي
وندير كما يدير فالواد العوام
يرخي العضا معاه ويساعف الغشام

هكداك سعفت ببصري صروف الايام
قل ديي وقوى صمتي وصنت فمي

ما قدرت على صلح ولا نجمت الخصام
واشتغلت مع الدنيا الفانيا بهمي

من لقاني يحسبني من جملة الكرام
ومن بغضني مايعرف غير دي شتمي

اخترت قصيدة مرسومة فرق قرطاس
مديح عجمي مايدري فاللغا نغايم

كغزالة حضرية من بنات اهل فاس
معنقة شي عبد من ضناية الصماصم
***
يا سرف الناس من بغالي د الجليا
وفرح قلبو على محاني واكداري

ياسر ف الناس من عطف قلبة ليا
واشفق من حالتي وبكاه غياري

يا سر ف الناس من ضحك وطنز فيا
يوم فراقي مع احبابي واوكاري

ياسر ف الناس من فتا الري عليا
وزين لي غالخروج من عتبة داري
ومشيت فليلتي من الساعة كاري
****
ما كترني بحبابي ايلا نكون فالخير
يظل وكري ويبات بمجمعهم عامر

شحال من صاحب توجد وكم من عشير
ايلا يكون طعامي فكل وقت حاضر

براطل الدار حديرةغير تنقب تطير
كيف حوت المشرع يجري عل الصنانر

هكداك اصحابي دارو جميع بالكاس
يوم اصبحت خالي لا مال لا مراسم

حق الغاني من عشراني يهز لي الراس
تقول عمرهوم ما كناوني بآسم

قصيدة الدمليج

قصيدة الدمليج

دمليج زهيرو صابغ الشفر كان فجيبي يا أهل الهوى ومشا ليا
باش نجاوب إلى تسال عنو تاج الغزلان

غاب زمان الهجرا وتاك بدري وهنا قلبي وراح من كل بليا
مهما زارت رسمي هلال عيدي راحت البدان
بتنا فحديث الحب والهوى وغزالي تهدي مدام كاس الحميا
واحنا فبساط رفيع ليس دركو عاشق فزمان
حتى راح الديجور والصباح تجلى ورمات فالشروق الذهبيا
وطيار الروض عالاغصان تنشد طبع صبيهان
قالت مصباح الزين يا العاشق هذا وقت الرواح من غير خفيا
ودعتك فحفظ الكريم من لا تراه عيان
نطقت وقلت لبودلال خفت يطول الميعاد يالعذرا البهيا
ولا تسناني يا الريم وتخليني هيمان
جبدت ولفي دمليج من ايديها زين الشفرين روح ذاتي مدميا
قالت ليا يا عاشق البها لا تبقى حيران
هاك الدمليج أعاشق المحاسن صونو وحضيه فالحجوب السريا
حتى نهدف ونزور مرسمك نصيبو محصان
ودعت هلال الزين تاج البها ورجعت من الفراق روحي مدهيا
وعملت فجيبي بالاشواق دمليج ضيا العيان
تم الدمليج مشى وطاح لي وبقا عقلي كيروج صبحان وعشيا
وانا لا حالة كيف حالتي في الضي و ديجان

*****
دمليج زهيرو غاب مبان وبقيت من فراقو مهموم حزين
ما تشاف مثيلو فيد سلطان عند العرب ولا فالهند وصين
دمليج لا يوجد فمكان فالروسيا ولا فخزين ستالين
دمليج الموضة يا فهيم من ذهب الصين وجا لتاج البنات هديا
صنعوا ماهر ذوقي لبيب وحكيم من اليونان
دمليج مرصع بالادرار من شغل الأناضول فيه حجرة تركيا
دارت بحجار الفوندو لا يدرك بثمن
دمليج لا مثلو وجاد عند الملوك الحاضرين في وطون أسيا
ولا في كندا ولا في أرض غموق السودان
دمليج ما وجد مثله في أرض الشام دون ريب وسوريا
ولا في القاهرة الصايلة ولا في عمان
دمليج الموضة ما وجد مثله عند اللي حايزين همة ومزيا
ولا دركوه اهل الاموال في الفرس وخرسان
دمليج الموضة ما يخلصو مال الأمريك والمدن الشرقيا
وكذ لك مال اسبانيا وغرناطة واشبيليان
مدت لي تاج الاريام هاذ الدمليج ولا عرفت كيف جرى ليا
وعملتو في جيبي وطاح لي ومشا يا الاخوان

طاح الدمليج وحار أمري وبقيت كنخمم ضي و ديجور
يعذر حالي من كان عذري ولا من بحالي جرحو معكور
سرت نفتش ونزاح صبري وانا كليح هايم والدمع يفور
درت في باب الخوخة مع الكنيف وحوز الكدان ما عطف قلب عليا
ورجعت على الصفاح كنسول دمعي هثان
ودخلت مع الاقواس والجزيرة حتى العدوة مع حواز المخفيا
بوعجارة درتو على النهاية واكد عجلان
قطعت الواد وسرت للصفيفح وانا حالي كظيم ما صبت حميا
وطلعت علىراس الجنان سولت اهل الغيوان
فتشت على الدمليج يالفاهم في الدوح ولا جبرت من يصغى ليا
ودخلت على صلاج كنفتش وانا ولهان
ما صبت من اعطاني خبار ولا من شافو يا رجيح فأحضان صبيا
وبقيت على الدمليج كنسول سرو يعلان

***********
سولت على الدمليج الاريام وانا فغير حال وقلبي مسقوم
درت فدرب السراج بقوام والطالعة صغيرة فضي و ديموم
سولت بعرفي ناس الغرام وجميع من صبية فبنات اليوم
درت فدرب الحرة مع السياج على دمليجي سألت ولفي ثريا
قالت لي ما شفتو ولا سمعت خبارو فمكان
سول فالقطانين راك تجبر تما جمع الاريام عند العشويا
ومشيت وسلت اهل الغيوان وليس خبرني إنسان
قالولي سول يا عشيق في حومة البليدة إيلا جبرتي ماريا
لعل تعطيك الخبار بالدمليج المصان
ومشيت للبليدة ودرت درب الميتر وسألت كل من هي ذوقيا
سولت ناس الحب والذي شاقو فالهجران
ومشيت ودرت فالزجزفور وانا واله وحدي ودمع العيان سخيا
والحفارين جميع درتها و زقاق الرمان

طال شقايا وهجرت المنام وانا كظيم هايم والعقل فليج
من حر الصد فقدت المرام بين الضلوع جمري موقود سريج
و فنا جسمي يا صاح وسقام لا حال حالتي بفراق الدمليج
فتشت فبوعقدة على النهاية وزقاق الما مشيتلو في صبحيا
ما صبت من عطاني خبار من كهول وشبان
وطلعتعلى المنية سريع وراحت الشمس الاولى وديك الفوقيا
ولدرب بن عزاهم سرت كالح قلبي لهفان
ومشيت معزم يا فهيم فتشت احواز الطالعة وناري مكديا
فطريق السنيما لقاوني زوج بنات كران
شافوني ناس الحب كنسول قالو مالك روح ذاتك مهديا
قلت مشا لي دمليج من فراقو عقلي هيمان
قالت وحدا يا عاشق البها دمليجك موجود عند هيفا بركيا
قالت لي صابتو نهار كان يزور السلطان
طحت وبست الأرض قلت ليها لاقيني بيه يا الريم العذريا
قالت دابا ياتيك بالوفا وهنا واطمئنان
قلت لها يا تاج البدور وين يكون الميعاد بينا دون خفيا
قالت يوم الجمعة الجاية تلقانا وكدان
أجينا لجنان السبيل قدام الصهريج الجديد وقت الذهبيا
تم رجانا ولاّ تصيبنا نرجاوك يعلان

************

راق الخاطر ونسيت الكدور ونكيت يا الفاهم جمع الحساد
وفرح قلبي ومشيت مبشور بقيت كنراجي شاخص التماد
في يوم الجمعة قمت مسرور مشيت بالاشواق في وقت الميعاد
صبت بنات الغيوان كتراجيني في الموعد بجلالب فضيا
وشرابل من ذهب الشريق والتلثيمة حسن
قالو سهلا وميات مرحبا بالعاشق الغريم ليك بشرة وهنيا
بايعت وقلت على وصولكوم تتفاجا الاحزان
قامو ومشاو بزوج باللطافة جابو وحدا ثالثا كن ثريا
قالو هذ العشيق صاحب الدمليج الفتان
قالت لي يا سود النجال دمليجك عندي دون ريب ولا شكيا
لكن لا تمشي لعندنا تصطاب الكيسان
قلت لها يا اعز البنات مالي قدرة حتى نخون بعد الولفيا
راقب فيا وجه الكريم نعم الحي المنان
مدت لي دمليجي وقلت ليها يجزيك بكل خير خالق البريا
قالت فالحين بلا جميل حشى مثلك يهان
ثم ودعت الباهيات وفرح قلبي ونسيت كل ما فات عليا
ولقاني بالدمليج رب الورى خالق الاكوان

************

دمليج الموضة جا ليدي واظفرت بيه وتفاجا كل غيار
وافرح قلبي ونسيت نكدي ورسلت للوجيبة صابغ الاشفار
راحت القلوب هلال عيدي سلطانة الغوالي حرة لبكار
وصلت رسمي تاج البدور زينة الآسم مكمولة البها الهواويا
صابت قلبي مسرور بالوصول وناشط فرحان
وانا محتال على وصولها من شوقي وجدت كل ما يزهى ليا
المقاعد والشليات جبتهم من الهندوسان
مهما جلست تاج الاريام ، نزلت انواع الطبخ والتفاكه وقتيا
كوكا كولا خلف الطعام شلّى نحكي بلسان
قالت مصباح الزين يا العاشق وين الدمليج قلت لضيا عنيا
دمليجك ودرتو وغاب عنّي ومشا ما بان
واحكيت لها يا صاح ما جرى لي وهلال الزين بارزة تصغى ليا
وانا قلبي مجروح فوق خدي دمعي هثان
قالت فالحين زها وريع، واعرف دمليجي يا عشيق ما يبقى فيا
قرب وانسى على وصولي ساير لمحان

دمليج زهيرو صابغ الشفر كان فجيبي يا أهل الهوى ومشا ليا
باش نجاوب إيلا تسال عنو تاج الغزلان

قصيدة الغزال فاطمة

قصيدة الغزال فاطمة

من نظم ادريس بن علي المالكي

اللازمة

ارحمي يا راحة العقل ترحامي …… من جفاك طال سقامي

كيف نبقى حاير و انت مسليه …… روفي يا لغزال فاطمة

***

امولاتي والحب والهوى والعشق ونار الغرام
من حالت الصبا في عضايا قاموا
كل واحد دار مقامو
في مهجتي وضحى بحسامو مع سهامو
يطعن ويزيد بالجراح عدامي … في غراد هذ الدامي
غير ملكت عقلي بجمالها وغلقت عنوة باب المراحمة
***
امولاتي ما كان هكذا ظني يا بنت الكرام
تعذبي بغير سباب غلامك
بعدما اقبلت قدامك
بالقهر رعيت ذمامك من غرامك
ضاعت بجفاك الطويل ايامي … يا غرايبي وهيامي
لاش عاقبتني بالظلم بعدما طعتك وانت الظالمة
***
امولاتي شوفي بعين المحنة في هذ الغلام
افاطمة انت بالحال سليمة
حالتي بجفاك سقيمة
كيف نبقى منسي ديما بلا جريمة
واش انت اليوم سمعك صامي …جاوبي جواب كلامي
بغيتك تصفي ذاك القلب لاين انا عبدك وانت الحاكمة
***
امولاتي افاطمة تحييني غير بالكلام
ما جاء رسول ما قلت لي كلمة
واش ما في قلبك رحمة
يا اللي صلت بالحكمة وحبك ما
في وسط القلب زاد نار ضرامي … بردي الصهد الحامي
بالوصال والمصال لي في شفتك ذيك العذبية الناسمة
***
امولاتي امتى نشوف قدك يتمايس كعلام
منه الياس والريحان تعلم
الشعر غسيق مظلم
كغراب عليه مرصم وضياء عم
يلوح من الجبين نوره سامي … به كيزول غتامي
والحواجب نونين معرقين الشفار بغير مدام نايمة
***
امولاتي عينيك زوج كيسان من عتيق المدام
من ذاق منهم شي يصبح هايم
والعطر في الخد مناعم
ورد عكري تحت صوارم فاح ناسم
والمعطس طير طار به منامي … بين الورود نسامي
والسنان احسن من حب الغمام والجيد غزال خشى من الرما
***
امولاتي وانا دخيل جيدك جودي لي بالمرام
روض الرضا يفوح علي بنسيم
ساعة نرى وجهك الوسيم
افاطمة قبلي عبد خديم قالت الريم
قبلتك طول الحياة غلامي … لا تظن تبقى ظامي
شق نهدي حتى نهدي كيوس فحضرتك تطفي حرقة الظما
***
امولاتي خدي نفرشو بالشوق لدوك القدام
ونقولك افاطمة زطمي
يا لي داوتي جسمي
امري بالعز وحكمي ولا تحشمي
ونشوفك يا الباهية قدامي … الرقيب بصره عامي
والحسود في غفلة وانا معاك تحت خيام الليل المخيمة
***
جات الميلاف راية الهشامي … ناوية تزور رصامي
تلحفت بثياب رفيعة وجات تتمايل كلياسة الناعمة
منين نظرت زينها بنيامي … قلت من صميم غرامي
كان هذي يقضة ولا منام عهدي بالشمس قبيل فالسماء
الساعة لاح نورها في رسامي … كصورة الادامي
والخليلة تضحك حتى تطيح وتقول انا لغزال فاطمة
شكيت لها بليعتي وهيامي … هيبتي في جل مقامي
قلت لها حالي وسلمت خليلتي هي بلي كان عالمة
سال بريق الرحيق يا لوامي … والنوامس والخوامي
غير حزت وقبلت ولا فعلت ما تصبح النفس به نادمة
هاك راوي رقايقي ونظامي … فوق الحرير الشامي
هاك فن قليل مثيلو فجيلنا فاق بالبلاغة التامة
لاهل التسليم تنهيب سلامي … واسمي فطرز ختامي
قول قال ادريس بن علي المالكي سلبتني الغزال فاطمة

قصيدة ناكر الاحسان من تراث الملحون المغربي

ناكر الاحسان

سير اناكر الاحسان** الايام تشيط وراك بالقهر 
ويبان البرهان** فيك امن خان حبيبو 
ــــــــــــــــــــــ 
ما صبرني للتيهان **غير نكايد ونزيد فالصبر 
وعقيلي حيران** شاكي من حر لهيبو 
طول دجايا سهران **وقليبي بالزفرات ينعكر 
وليت كما اليرقان **جرحي ما صاب طبيبو 
لو نكتم سر يبان** بعد خفيتو يا لايمي ظهر 
ركبت القومان **عن سري بعد حجيبو 
وانت قلبك حقدان** ماشفك حالي زايد النفر 
في شروط التيهان** فعلك مازال تصيبو 
ــــــــــــــــــــــ 
عاشرتك بالصدق والوفا** واللي فيَّ راك عارفو 
وانت مني رايد الجفا** واناوعدي كنصرفو 
خفت عليك اشارد العفا** من ذنبي دغيا تصادفو 
مايلقاك أمان** من تغرادي عن ساير العمر 
وكثير الختلان** مايطلع عقبة ذيبو 
كيف يمنع العشران**- من طيبو بين الناس ينشكر 
ما يغدر لو كان** في الوكر معه طليبو 
شفتك جيتي زربان** غروك صحاب الفيش والفشر 
من لا ليهم شان** في نهار الضد يغيبو 
لاكني سير وكان** لابد كثير الجهد ينكسر 
من بعد الديدان** سيسان الغدر يريبو 
ــــــــــــــــــــــ 
كنت نظنك صاحب العقل** ما ترضى برفاقة الغشام 
غروك اهل الفيش والبخل** ما ليهم صولة ولا كلام 
وتجبرتي ناقص الفعل** وجازيتيني بلا خصام 
فغراض العديان** دزتيني ياصابغ الشفر 
وغواك الشيطان** مثلي موحال تصيبو 
لو جلتي في البلدان** وتسال البادية مع الحضر 
ما توجد انسان** مثلي ساخي بنصيبو 
نفادي بالسلوان** فبساط العز وغاية الفخر 
بوجود المزيان** كل ما قال نجيبو 
ما يقهرني خسران** راخي طرفي قدام من حضر 
نسخى بالثمن** في حق الزين نهيبو 
ــــــــــــــــــــــ 
ما يسلك مناهج الهدى** من هو كيفك خارج الحدود 
من يسرك محال تنفدى** من حر الهجرة مع الصدود 
بيَّ غير شفاية العدا** وكلام الحساد والعبود 
من درتيهوم صدقان** سمحتي فيَّ يا خايب الطبع 
في غراض الرقبان** والقلب كميت لهيبو 
زدتي قلبي نيران** وانت هايم ما جبت لي خبر 
قلبك حين شيان** رجع قطران حليبو 
كي قالو ناس زمان** من دار الشر يموت بالغدر 
واللي جاد يبان** من دار الخير يصيبو 
قبلك فاتو شبان** ما دامت ليهم حالة الصغر 
غير فلان فلان** كبروا وضحاوا يشيبوا 
ـــــــــــــــــــــ 
سير أجافي من جنبي دفع** ما باقي في خصامنا رجوع 
فيك سمحت اخايب الطبع** حين تبعتي لامت الفزوع 
ما فيها طيبة ولا نفع** عشرتك يا باخس السلوع 
وإلى كنت شيهان** ركبتك يوم الحرب مشتهر 
قدام الفرسان** واليوم لغيت ركيبو 
و إلى كنت بستان** غنمنا حسن الياس والزهر 
وجنينا الاغصان** وثمارك قبل يطيبو 
و إلى كنت مزيان** دوزت معاك أيام تنشكر 
و شفيت بالعيان** فجمالك قبل يخيبو 
الايام الى تزيان** تبني بنيان تشيد القصر 
بالزاج و طيقان** والنقش على ترتيبو 
الايام الى تشيان** كتكسف ضي الشمس والقمر 
بعجاج ودخان** ونجوم الليل يغيبو 
العفو بيد الرحمان** نجاني منك شامخ القدر 
نسعاه الغفران** لابد يهون صعيبو 
قال فصيح العنوان**من دازك دوزو لازم لوقر 
ما حَدُّو فكعان** دغية عَزَّمْ تجنيبو 
خوذ رقايق الاوزان** شغل أنجار الفايز الحبر 
رصاع العقيان** هذا هو ترتيبو 

قصيدة الزردة من نظم الحاج "محمد بن علي المسفيوي"

من أروع قصائد الفكاهة المغربية من نظم الحاج "محمد بن علي المسفيوي"

قصيدة الزردة

الحربة

ضيفك أجاري شبعني
وليس تعمل بشوار
زيد بي للدار
بلحسان كرمني
ولا تكثر هدرة

القسم الأول

ضيف ربي جيتك للدار
زيد بي من غير شوار
كان كنت جيد وكريم
لا دير معايا صرف لبخال
ارفع بيَ يجزيك خير ربي
لايني سامع لخبار
عليك ألوليف
كرمني في حق جورة

ودير ما قال الله
وصاك على الضيف تكرمو
والجار بَرّْ به قبالة
واللي بخيل ربي ذمو
عايش فالمكر وجهالة
لا بوه يكرم لا عمو
البخل فيه حق سلالة
واللي كريم ربي كرمو
كتبو فلامة الفضالة
ناس لحسان

تعرف وصفي مولوع بالزرادي
دايم فكل يوم
نحب الزردة لو تكون فبغداد
قريبة نقول
وكثير إلى كانت
عند واحد مثلك
وافي كريم جيد صبار
بَرّْ يرفد بالعار
في متاعو يصبر
ولا رضى بالقهرة
زيد بي للدار سريع
كون تايك بطار
يجزيك القهار
لا تخاف ولا تدهش
ما تقيسك عثرة
والذي ليك نقول تحضرو
بغير افتخار
من نعايم تذكار
باش نفخر ونصول
بجودك على الحضرة

القسم الثاني

هات لي فالأول سكسو
ولا تخلي حد يمسو
يكون في شي طبسيل كبير
بالزبادي راوي
واعمل عليه غنمي
وخضاري رايقة نفيسة
دير تفاية مع الزبيب
ولوز وبصلة
كذاك سفة بفراخ من الحمام
مردومة وسخونة
مع الشعرية للغاها عشيق
والروز يطيب مليح
بالحليب الصافي
أرى من الفداوش شربة
وتكون راوية وسخونة
إلى دخلْتْ وسط القبة
أرى طواجنك وصحونة
ليَ تكون تقول مرحبا
هاك لبساط للمحسونة
واللوز في وسطها ينبا
وكذاك بالسمن مدهونة
ومحنشة نحب فرغبة
وتكون رايقة وسخونة
طبسيل جيب لي من بغرير
وكذاك سير للسفاج الوافي
تجيب عشرة كيلو
وتكون بالسمن والعسل
ومخرقة وشباكية
وحدة نديرها متنية
في كل جيه
المقروط الباهي
ورزة القاضي
كعب غزال ولكعاك
مية من لغريّْبة
تقد للفطار
والمرق باليَبْزار
جيب خبز السميد الصافي
عجب للنظرة
هات لي كباب المغدور
ضد فاللي غدار
فيه بيض بتعفار
وكذاك جيب المشوي 
يْقامتو معتبرة
ومن الكفتة وجَّدْ لي
ميات قطيب عل النار
كذاك تدير كوار
بالفلافل ويكونوا
في طواجن كثرة
هات القلية فصحونة
مزوقة من بلار
كتلذ لّفكار
والخليع المقيوم
تريع به الفكرة

القسم الثالث

هات الطواجن عل الأشكال
من لحم الغنمي يقبل
دير طاجين مخضر يا لبيب
بالزيتون وليمون
دير واحد لمروزية
مع البطاطا واللفت
ولوبيا والملوخية
ذاك الشوا يعجبني
منو خروف جيب معمر
وآخُر بعد منو يعني
فالفرن طايب ومتحمر
خمسين راس بها نثني
والهركمة عليها نفطر
وكذاك جيب لي المعسل
نبغي تكون عايق فايق
وسط النهار
نعطيك خبار
جيب قصعات كبار
بشي تشيشة كرداس
يكون الطواجن كثرة
باداز سخون نحبو
في يمين أو يسار
كان هطلت لمطار
عل البيصار موجد
ما نصيب عنها صبرة
هات لي فول مدمس
من هواه هيج لفكار
من الحمص قنطار
والباقي تقليه
دون الشهرة
جيب لي بركوكش بالحليب
طايب عل المقدار
فيه نفديوا الثار
من الصغر يعجبني
ما صبت عنو صبرا

القسم الرابع

هات لي خمسين دجاجة
ردت بها نقضي حاجة
بالنوى عمر لي عشرة
وبالسمن عشرة حمرهم
زيد عشرة بالمعدنوس والفلافل
طيب عشرة مزعفرين
ومرق لخرين
هات لي بيبي والوز
جيب لي خمسين دجاجة
على التمام طاجين من الزرزور
كنحب يوجد لفطور
لا تكون مغشم
وغزال طايبة مقيومة
وإلى تجيبها توقف تم
نوصيك لا تكثر لومة
ومية من القنية تقدم
وتكون بالشحم منعومة
ومية من القنافد سلم
فيها جوارحي مغرومة
وكذاك لحجل به انتم
الارنب صورتو منعومة
ثم تجيب عشرين من الشابل
طايبة وذكية
وخرين كيفها مقلية
فيها نضرب غلقة تشكار
لا تحضر لي جار
تركني وحدي وصغى
للاقوال بجهرة
هات شرغو والبوري
جيب فرخ من سبع شبار
والمرينة تذكار
ساركنة مقيومة
جيب منها عشرة
والقرب والنون فأكلو لذيذ
يصلح لصيار
ليس تنسى البحرار
كان بي برد
بطعمو ضراري تبرى
جيب لي سردين يتقلى
ويتجمر فصهد النار
ليس تعمل توخار
كن محزم ومني
ليك حق السخرة

القسم الخامس

هات الشلايظ مولاتي
على الأشكال تلذ لذاتي
والتراقد فخلول
محمضة ولطيفة
حضّر سكرة من العنب
وحمل دلاح
هات بطيخ كبير**وما يماثلو 
من فكوس ولينكاص
مشماش مع التفاح
من العرصة شامي
والليم كان يحضر فالحين
مية نحبها قدامي
كرموس النصارى والتين
رمان به لذ طعامي
برقوق ما يلي عنه لين
فيكل يوم قنطار يجيمعلوم
والتمر قنطارين على الدوام
وكركاع مع اللوز
والزبيب الابيض مع الموز
جيب لي كوز من بلاد الهنود
وبلوط وقسطال
والشراب الطيب لحلال
جيب لقوالب من سكر
دير شاي
دير الزردة

الخاتمة

استغفر الله من عثرة لسان
نطلب رب الورىيبسط عنا
على الدوام نعمتو
ونهاية اللغا يا حفاظ
خذها خريدة
برزت فحلول رايقة ونفيسة
صعبة على الجحيد الدامر
وعلى كل داعي
ما يقوى للحراب
ساعة الابحار
بالحسام البتار
كان طاح فيدي
ويحو نقطعو بالشفرة
كان يجحدني يعرفني
فقلب عينو زنجار
ليه نسقي لمرار
لو تكلم باسل
وثقيل عند الشعرا
لويصرصر بازي تخمد
موكة فلقفار
والسلام للحبار
لشياخ وطلبة
وعلى اولاد الزهرة
من ابن علي مسفيوي
في تراجم الفن عبار
زار نعم المختار
سيدنا محمد لحبيب
تاج العشرة
الصلاة والسلام عليه
دايمة كل نهار
من الحي القهار
قد ما خلق الله
ميات آلف مرة